Irene Agyepong

Wɔakyerɛw nsɛm yi wɔ Akuapem kasa mu

Irene Akua Agyepong yɛ Ghana ɔmanfo akwahosan ho oduruyɛfoɔ a ɔwɔ Dodowa Health Research Center na ɔyɛ Ghana College of Physicians and Surgeons Faculty of Public Health no muni . Agyepong dii The Lancet bagua a ɛhwɛ akwahosan ho daakye so wɔ Afrika Sahara anafo fam no anim.

Mfitiase asetra ne nhomasua

Bere a Ageypong yɛ abofra no, na ɔpɛ sɛ ɔkyerɛw, ɔpam ade na ɔyɛ oduruyɛfo. Awiei koraa no osuaa aduruyɛ wɔ Ghana Sukuupɔn Aduruyɛ Sukuu mu . Otu kɔɔ West African College of Physicians, faako a ne maame nuabea Phyllis Antwi hyɛɛ no nkuran sɛ ɔnyɛ ɔmanfo akwahosan ho ɔbenfo. Bere a Ageypong wiee sukuu no, ɔyɛɛ adwuma sɛ aduruyɛ mu ɔpanyin wɔ asɛmpatrɛw ayaresabea bi. N’adwuma a edi kan no mu biako ne adwuma a ɔyɛe wɔ awo ho; a ohui sɛ ɛyɛ nkate fam asɛnnennen no. Wɔ nsɛm a wobisabisaa The Lancet mu no Agyepong kyerɛkyerɛɛ mu sɛ, “Na eyi yɛ Ghana wɔ 1980 mfe no mu —na yɛda so ara repue afi sikasɛm bere a emu yɛ den ankasa mu. Ɛtɔ da bi a na nsateaa nni hɔ, na nnade a ɛfata nni hɔ, ɛtɔ da bi nso a na wuntumi nnya nneɛma a ɛnyɛ den te sɛ scalpel...Na na mogya akorae biara nni hɔ...Wobɛtumi ama obi awu ansa na mogya a ɛdɔɔso aba. Anka wubehu nea wobɛyɛ —nanso wuntumi”. Saa bere no Aduruyɛ Dwumadibea sohwɛfo Moses Adibo hyɛɛ no nkuran sɛ ɔnyɛ adwuma wɔ amanaman ntam, na otu kɔɔ United Kingdom kɔsuaa ɔmanfo akwahosan ho ade wɔ Liverpool School of Tropical Medicine . Awiei koraa no Agyepong tu kɔɔ United States, na owiee oduruyɛfo abodin krataa a ɔde suaa asramma ano aduru ho ade wɔ Ghana .

Nhwehwɛmu ne adwumayɛ

Bere a Ageypong nyaa ne oduruyɛfo abodin krataa no, ɔsan kɔɔ Ghana . Awiei koraa no, wɔyɛɛ no Greater Accra mantam no Akwahosan ho Ɔkwankyerɛfo. Na ɔwɔ dibea a wɔbom yɛ wɔ Ghana Sukuupɔn Sukuu a ɛhwɛ ɔmanfo akwahosan so.