Tamfo Bebre

“Tamfo Bebre” yɛ Akanfoɔ adinkra ahyɛnsodeɛ no mu baako a wɔkyerɛ aseɛ wɔ Akan kasa mu sɛ onipa a ɔtan obi no, ɔno nso rennya ahotɔ. Saa ahyɛnsodeɛ yi kyerɛ ahoɔyɛa, anibrɛ anaa sɛ nipabɔnefosɛm a ɛwɔ nnipa binom so a sɛ wɔnnsesa amfiri wɔakwan bɔne ho a, wɔbɛbrɛ. Akanfoɔ hwɛɛ nnipa su na wɔde nwenee saa ahyɛnsodeɛ yi.

N’ABƆSEƐ NE ABAKƆSƐM

Adinkra ahyɛnsodeɛ "Tamfo Bebre" firi Gyaman a ɛwɔ Bonoman mu. Na abakɔsɛm kyerɛ sɛ Gyaman hene Nana Kwadwo Agyemang Adinkra na ɔyɛɛ saa ahyɛnsodeɛ yi. Na ɔyɛɛ saa ahyɛnsodeɛ yi too akonnwa a na ɔte soɔ. Na berɛ a Gyamanfoɔ dii nkuguo wɔ wɔne Asante ko no mu no, wɔn amammerɛ ne amanneɛ no nyinna bɛgyee nhini wɔ Asanteman mu. Na Asantefoɔ nso gye too mu. Enti wɔhyɛɛ Gyamanfoɔ a na wɔnwene saa ahyɛnsodeɛ yi ma wɔyɛɛ bi maa Asante ahenfo no nyinaa. Na wɔsan nso kyerɛɛ Asantefoɔ no sɛdeɛ wɔnwene no.Na ansa na no, na wɔnwene ahyɛnsodeɛ yi to wɔn ntoma mu ne wɔn ahenfo akonnwa ho a na wɔde da Akanfoɔ tirimupɔ adi sɛ nipa bɔneni a ɔhwehwɛ bɔne ma ne nua no,ho renntɔ no da. Ɛyɛ kɔkɔbɔ de ma nipa a ɔnpɛ ne nua yie.

FILƆSƆFI

Akanfoɔ tirimupɔ mu no, ɔtamfo a ɔhwehwɛ bɔne ma nnipa no, ɔha ɔno ara ne ho, sɛdeɛ wɔwɔ ɛbɛ bi a wɔtaa bu sɛ; " hann rennwane, gye sɛ sum ato no". Saa abɛbuo yi kyerɛ sɛ bɔne biara a wodwene fa wo nua ho no, wobɛnya ho asotwe.

N’ABOSUO

Sɛ wohwɛ adinkra ahyɛnsodeɛ "Tamfo Bebre" a, ɛte sɛ kora. Na ɛyɛ den sɛ wobɛmoa no; faako a ɛyɛ den no, pia ba fam a ɛyɛ den sɛ wobɛsɛe no. Sɛdeɛ ahyɛnsodeɛ yi si teɛ no ma yɛhunu brɛ a atamfo brɛ berɛ a wɔpɛ sɛ wɔsɛe obi no. Ahyɛnsodeɛ yi wɔ abosuo bi a ɛwɔ nhoma a akyeakyea. Na ɛno ma wohunu ne den a ɛbɛyɛ berɛ a wopɛ sɛ wosɛe  wo yɔnko.