Nsaguo

Wɔatwerɛ nsɛm wei ɛwɔ Asante kasa mu

Nsaguo yɛ ɔkwan a Akanfoɔ nam so de wɔn ahiasɛm to Onyankopɔn ne nananom anim.Wɔnam nsamanfoɔ, Asase Yaa, ahonhom ahodoɔ ne abosom so. Sɛ wɔrebɔ mpaeɛ no a, wɔde nsa gu fam,ɛno nti na yɛka sɛ wɔregu nsa. Mpaeɛ yi ne ɔkwan a Akanfoɔ fa so ne Onyame ne ahonhom nkaeɛ no di nkitaho. Wɔde srɛ adeɛ firi Onyame, abosom ne nsamanfoɔ hɔ.

Berɛ a wɔyi apaeɛ

Ɛnam sɛ Akanfoɔ wɔ gyidie wɔ Onyankopɔn,nsamanfoɔ,Asase Yaa ne ahonhom mu nti, wɔwɔ berɛ pɔtee a wɔde yi apaeɛ anaa sɛ wɔgu nsa de wɔn ahiasɛm to wɔn anim. Berɛ a ɛdidi soɔ yi nyinaa yɛ berɛ a wɔde gu nsa;

• Bragorɔ
• Awaregyeɛ
• Awareguo
• Ayiyɔ
• Akwantuo berɛ
• Abadintoɔ ne deɛ ɛkeka ho nyinaa.

Nnipa a wɔtumi gu nsa

Akanman mu no,ɛnyɛ nnipa nyinaa na wɔtumi gu nsa. Yɛwɔ nnipa kuo pɔtee bi a wɔwɔ ho kwan sɛ wɔdi saa dwuma yi. Wɔn ne;

• Ahemfo
• Akyeame
• Nsumankwaahene
• Abusuampaninfoɔ

Nsaguo nhyehyɛeɛ

Nsaguo nhyehyɛeɛ kyerɛ sɛdeɛ wɔgu nsa firi ahyɛaseɛ kɔsi awieeɛ.Akanfoɔ nsaguo wɔ nkyekyɛmu nnan. Weinom ne;

• Ɔfrɛ; Sɛ obi regu nsa a, ɔdi kan frɛ Onyankopɔn, Asase Yaa, abosom, nsamanfoɔ ne ahum ne aham sɛ wɔnmɛtie wɔasɛm mma wɔn.Ɛno ne ɔfrɛ no.
• Amanebɔ; Afei wafrɛ ahonhom no awie no,ɛha na wɔka deɛ enti a wɔtoo nsa frɛɛ wɔn no. Wɔka wɔn ahiasɛm kyerɛ ahonhom no.
• Nnome/Nhyira; Wɔsrɛ nhyira ma wɔn adɔfo na wɔtumi dome wɔn atamfo nso.
• Awieeɛ; Wɔde wɔn nsɛmkaeɛ no ba awieeɛ na wɔda ahonhom no ase sɛ wɔatie wɔn.

Nsaguo mu ɔyɛkyerɛ

• Nsaguo mu ɔyɛkyerɛ gyina hɔ ma ɔkwan a wɔfa so gu nsa. Sɛ obi rebɛgu nsa a, ɔhunu sɛ ɔgyina Onyankopɔn ne nananom anim. Wei nti ɔde obuo ne ahoteɛ na ɛgyina wɔn anim. Na wɔnsere nso sɛ ɛyɛ anigyesɛm mpo a wɔnsere ɛfiri sɛ saa berɛ no ɔgyina Onyankopɔn ne nananom anim. Na sɛ ɛyɛ dabɔne a, oniiko no fura kɔbene na ɔworɔ ne mpaboa. Afei ɔkwaha ne ntoma na ɔtia so kakra.
• Wɔde broni nsa, nsafufuo anaa sɛ apeteshie na ɛgu nsa gye sɛ ɛyere so pa ara na wɔde nsuo yi apaeɛ ɛfiri sɛ adeɛ a wɔde nsa yɛ no wɔnfa nsuo nyɛ.
• Afei ɔkasa anidie kwan so. Ɔtumi de abɛbuo ba ne kasa no mu.Na nipa a ɔgyina ne nkyɛn no gyegye ho sɛ wiɛ!, wiɛ! de hyɛ ɔyɛfoɔ no nkuran.
• Sɛ wɔregu nsa nso a,wɔdi kan de nsa no bi gu fam na ɔde n’akyi akyerɛ mpaninfoɔ na ɔde n’anim ahwɛ nkwankwaa. Wei kyerɛ sɛ mpaninfoɔ ne nkonnwa no mmɛgyina n’akyi akyigyina pa.
• Onwunu dwo a, yɛnfrɛ nsamanfoɔ nti wɔngu nsa anwummerɛ.

Nsaguo ho nhwɛsoɔ

Onyankopɔn Twediampɔn Kwame

Asase Yaa

Abosonnuasa nyinaa,nsa

Aduanafoɔ nsamanfoɔ,nsa

Yɛafrɛ baako yi,yɛnim sɛ mmusua a aka no nyinaa ate

Yɛahyia ha a, na ɛyɛ anigyeɛ so koraa

Ɛnnɛ yi mo ba Yaw Boadu ne ne yere Akosua Mansa

Aware awo ba barima a yɛroto no din

Yɛsrɛ mo nkyɛn ɔnyinikyɛ ma no

Mommɛdom ne nyansa ne nimdeɛ a mode buu ɔman yi bi

Na momma no atuwohoakyɛ honhom

Mommma ɔnmmɛyɛ ɔyɛkyerɛ nkɔ

Ɔmɛnyini no abaduasa

N’awofoɔ nso,yɛsrɛ nyansa ne nimdeɛ ma wɔn

Momma wɔn ahoɔden ne boasetɔ

Yɛn a ahyia ha nyinaa nkwa so

Ɔtamfo a ɛkaa ɔno nko ɔse Yaw Boadu reto ne ba din

Enti adeɛ bɛyɛ ne yere ne ne ba deɛ

Yɛsrɛ mo sɛ monfrɛ saa nipa no na montu no fo

Momma nsuo a ɛnni anwea mmɛfa no awia ketee

Na yɛn nso de asabɔne akɔ n’ayie

Nsa ni oo!!

Nsa.

Nsaguo ho mfasoɔ

• Ɛda Akanfoɔ gyidie adi.
• Ɛma yɛne ahonhom di nkitaho na yɛnya wɔn nkyɛn mmoa.
• Ɛma yɛnya anidasoɔ wɔ abrabɔ mu.
• Ɔkwan a wɔfa so srɛ Onyankopɔn ne nananom mmoa ne nhyira.
• Ɛma nnipa nya honhom mu ahoɔden ne ahobammɔ.
• Ɛboa ma abusua ne kurom nyinaa nya asomdwoeɛ ne nkɔsoɔ.
• Ɛma Akanfoɔ bɔ wɔn ho ban firi bɔne ne amanehunu ho.