Edin Nkyerɛkyerɛmu

Wɔatwerɛ nsɛm wei ɛwɔ Asante kasa mu

Edin Nkyerɛkyerɛmu yɛ asɛmfua anaa nsɛmfua bi a yɛtumi de si edin bi ho de kyerɛkyerɛ edin no mu ɛwɔ edin kasasin mu. Ɛtumi nso ba asɛm akyi de kyerɛ dekodeɛ a ɔyɛfoɔ no reyɛ anaa tebea a ɔwɔ mu. Nhwɛsoɔ; tuntum, fitaa, kɛseɛ, tenten.

Edin Nkyerɛkyerɛmu Nkyekyɛmu

Wɔ Akan kasa mu no, edin nkyerɛkyerɛmu wɔ nkyekyɛmu titire mmiɛnsa. Yeinom ne;

Deɛ ɛdi kan yɛ deɛ yɛde kyerɛ suban anaa teberɛ

Deɛ yɛde kyerɛ suban anaa teberɛ no wɔ nkyekyɛmu ahodoɔ mmienu:

• Deɛ ɛdi kan no, yɛtumi de bata edin bi ho prɛko pɛ de ka ho asɛm. Sɛ ebia; Anomaa ketewa bi si dua no so.
• Deɛ ɛtɔ so mmienu no, yɛde si adeyɛ asɛm /yɛ/ akyi ma ɛyɛ ayɔdeɛ ma no. N'adwuma ne sɛ ɛkyerɛkyerɛ edin a ɛyɛ ɔyɛfoɔ no su anaa ne tebea mu. Nhwɛsoɔ; Atadeɛ no yɛ fɛ.

Deɛ ɛtɔ so mmienu yɛ deɛ ɛkyerɛ dodoɔ pɔtee

Saa edin nkyerɛkyerɛmu yi taa nya akontabudeɛ a ɛkyerɛ dodoɔ pɔtee wɔ Twi kasa mu.Sɛ ebia;

• Mewɔ nkokɔ mmienu wɔ buo no mu.
• Nkraman mma mmiɛnsa hyehyɛ kɛntɛn no ase.
• Ɔwɔ nkoa baanan.

Deɛ ɛtɔ so mmiɛnsa yɛ deɛ ɛnkyerɛ dodoɔ pɔtee

Yei nso wɔ akontabudeɛ a ɛntumi nkyerɛ dodoɔ pɔtee. Sɛ ebia;

• Nnipa beberee na ɛwɔ abɔntene so hɔ.
• Nsuo ketewa bi na ɛwɔ ahina no mu.
• Mako pii na ɔde yɛɛ nkwan no.

Deɛ ɛtɔ so nnan yɛ edin nkyerɛkyerɛmu a yɛde yi biribi adi anaa yɛde kyerɛ biribi

Yeinom nso na ɛdidi soɔ yi;

• Bɛn- sɛ ebia; Aboa bɛn na wabɛwe borɔdeɛ no nyinaa yi?
• Ko- sɛ ebia; Menim ɔnii ko a ɔfaeɛ.
• Yi- sɛ ebia; Ɛnam yi aporɔ.