Akanfoɔ Mmɛ

Wɔatwerɛ nsɛm wei ɛwɔ Asante kasa mu

Ɛbɛ wɔ nkyerɛaseɛ ahodoɔ pii. Ɛbi ne;

• Ɛbɛ yɛ mpanin kasa a ɛmu dɔ yie,a yɛn nananom tetefoɔ nam wɔn nyansa ne nneɛma a ɛsii wɔn abrabɔ mu no ahyehyɛ de agya nkyirimma.Yɛde abɛbuo kyerɛ nsɛm bi a yɛpɛ sɛ yɛka ase, na yɛde si so dua ma nnipa te aseɛ pefee. Akanfoɔ gye to mu sɛ abɛbuo yɛ kasa aduruadeɛ a ɛma kasa no yɛ dɛ san nso yɛ hwam.
• Ɛbɛ yɛ asɛm a wonim no yie,na ɛka nokorɛ anaa afotusɛm bi a ɛfa biribiara ho.
• Ɛbɛ da adwene titire bi adi wɔ asɛm mu ma nteaseɛ ba.

Mpɛn pii no, sɛ obi rebu bɛ a, ɛsɛ sɛ ɔhwɛ nneɛma mmiɛnsa ansa na wɔabu bɛ;

• Ɔhwɛ asɛm a asi no ho.
• Beaeɛ a wɔreka asɛm no.
• Nnipa a wɔahyia hɔ a wɔretie asɛm no.

Akanfoɔ Mmɛ Ahodoɔ

• Ɛbɛ turodoo
• Asɛm sɛ-bɛ
• Nnyeso-bɛ
• Abɛbudeɛ

Berɛ A Akanfoɔ Bu Bɛ

Akanfoɔ nni bere pɔtee a wɔde bu bɛ. Na mmom sɛ asɛm ba a na wɔbu bɛ. Ɛno nti Akanfoɔ wɔ asɛm a wɔka sɛ; "sɛ asɛm mmaeɛ a wɔnmu bɛ".

Ɛbɛ So Mfasoɔ

• Ɛma anigyeɛ, ɛnkanka berɛ a ɔmanfoɔ ahyia resi mmɛ ho akansie.
• Ɛma deɛ ɔrebu no nya obuo firi afoforɔ nkyɛn.
• Yɛde mmɛ twa asɛm a ɛnka ɛbɛyɛ tenten so tiawa.
• Yɛde mmɛ tu fo.
• Ɛbɛ da Akanfoɔ nyansa, wɔn nimdeɛ, wɔn gyidie ne wɔn abrabɔ mu nsɛm nyinaa adi.