Adeyɔ Mu Kyerɛfoɔ (Adverb)

Wɔatwerɛ nsɛm wei ɛwɔ Asante kasa mu

Adeyɔ mu Kyerɛfoɔ yɛ asɛmfua anaa nsɛmfua bi a wɔde kyerɛkyerɛ adeyɛ asɛm bi mu wɔ ɔkasamu bi mu. Saa ɔkyerɛfoɔ yi dwumadie ne sɛ, ɛkyerɛ faako a wɔyɛ biribi a, berɛ a wɔyɛ biribi, adeyɔ no yɔbea, adeyɔ no anoɔden ne deɛ ɛkeka ho.

Nhwɛsoɔ; bɔkɔɔ, ntɛntɛm, koraa, dodo, paa, kwa ne deɛ ɛkeka ho nyinaa.

Adeyɔ Mu Kyerɛfoɔ Nkyekyɛmu

Adeyɔ mu kyerɛfoɔ gu ahodoɔ nsia.

Yeinom ne;

Beaeɛ Kyerɛfoɔ

Ɛyɛ ɔkyerɛfoɔ a ɛkyerɛ faako a adeyɛ bi kɔ so anaa sɛ wɔyɛ biribi. Nhwɛsoɔ;

• M'asoma Kwaku wɔ kurom.
• Ɔkɔ dwom.
• Ɔwɔ no kaa no mfikyire hɔ.
• Kwame da ɛdan no mu.

Berɛ Kyerɛfoɔ

Ɛyɛ ɔkyerɛfoɔ a ɛkyerɛ berɛ a obi yɛ biribi. Nhwɛsoɔ;

• Aboagye bɛkɔ Kumase ɔkyena.
• Ɔbaa ɛnora anwummerɛ.
• Mɛkɔ Nkran ɛnnɛ.

Yɔbea Kyerɛfoɔ

Yɛde kyerɛ adeyɔ bi yɔbea anaa ɔkwan a obi fa so yɛ biribi. Sɛ ebia;

• Aberewa no nante brɛoo.
• Afuo no afu kusuu.
• Ne ntoma no atete pasapasa.

Dodoɔ Kyerɛfoɔ

Yei kyerɛ mpɛn dodoɔ a ɔyɛfoɔ bi yɛ biribi anaa asɛm bi asi. Nhwɛsoɔ;

• Ɔba ha daa.
• Ɔkɔ hɔ awia biara.
• Ɔbosom anim wɔkɔ no mprɛnsa.

Anoɔden Kyerɛfoɔ

Anoɔden kyerɛfoɔ yɛ nsɛm bi a yɛde bata anaa yɛde ka biribi fa adeyɔ bi anoɔden ho. Nhwɛsoɔ;

• Ɔhwee abɔfra no yie.
• Ɔdi hia buruburoo.
• Ɔbaa no nim nyansa dodo.

Ampayɛ anaa Akyinnyegyeɛ Kyerɛfoɔ

Saa ɔkyerɛfoɔ yi kyerɛ sɛdeɛ yɛsi bu adeɛ bi a yɛyɛ, sɛ ɛyɛ ampa anaa akyinngyeɛ wɔ ho. Ɛbi ne; ebia, ampa, nokware,gyama, sɛsɛɛ, anhwɛ a, nyanya biara. Nhwɛsoɔ;

• Abɔfra yi ani abue ampa.
• Gyama Akwasi kɔ akuraa.
• Anhwɛ a, nsuo yi bɛtɔ.